طلسمِ گوہر بار

طلسمِ گوہر بار منیر شکوہ آبادی کی تصنیف ہے۔ انھیں جنگ آزادی میں حریت پسندوں کا ساتھ دینے کے الزام میں حبسِ دوام کی سزا ہوئی اور 1860ء میں انھیں جزیرہ انڈمان بھیج دیا گیا جہاں وہ معمولی مشاہرے پر قیدیوں کے محرر مقرر ہوئے۔ وہ کسی طور کتب بینی اور تصنیف کے عمل سے وابستہ رہے۔ پانچ سال کی قید کے بعد انھیں رہائی ملی۔ طلسم گوہر بار کا یہ نسخہ جسے مدون کر کے شائع کیا گیا ہے پہلی بار آگرہ سے 1887ء میں چھپا۔ مذکورہ نسخے کا مخطوطہ رام پور (بھارت) میں موجود ہے۔ منیر شکوہ آبادی کمال کے داستان نویس تھے۔ یہ ایک ہوش رُبا داستان ہے۔ محمد سلیم الرحمٰن نے اس دلچسپ داستان کی تدوین کی ہے۔ اس نسخہ کا ایک قابلِ ذکر پہلو یہ ہے کہ بطور ضمائم منشی تصدق حسین کی لکھی ہوئی ’’طلسم گوہر بار‘‘ کی واقعاتی ترتیب کے ملخص کے علاوہ داستان کے الفاظ کی فرہنگ بھی شاملِ کتاب ہے۔ جو داستان فہمی کو آسان بنا دیتی ہے۔ داستان کا ہر عنوان قاری پر ایک تجسس طاری کرتا ہے۔ چناںچہ وہ نہایت دلجمعی سے داستان کے مطالعے میں گم رہتا ہے۔ جدید افسانے اور ناول کے دور میں اس داستان کا مصنف اپنے قاری کو ایک نئے جہان اور نئے کردار سے متعارف کرواتا ہے۔ سائنس فکشن کے زمانے میں جب فلم اور ادب پر اس کے گہرے اثرات مرتب ہو رہے ہیں، ایسے ماحول کا پروردہ قاری داستان پڑھتے ہوئے مختلف کرداروں کا مشاہدہ کرنے لگتا ہے۔