صحیفہ ناصر کاظمی نمبر

تقسیمِ ہند کے تجربے نے ایک ایسا طرزِ احساس پیدا کیا جس کو عام استعداد کا شاعر، ادیب اپنا تخلیقی محرک نہیں بنا سکتا تھا۔ یہی وجہ ہے کہ قیامِ پاکستان کے بعد ہجرت کو موضوع بنانے والے شعرا و ادبا کو ایک ہاتھ کی پوروں پر پرکھا جا سکتا ہے۔ اس کو ایک مکمل تخلیقی تجربہ بنانے والوں میں نمایاں ترین نام ناصر کاظمی کا ہے جن کے ہاں ہجرت اداسی کی تہذیب میں بدل گئی اور پھر یہ اداسی اپنے معلوم اسباب سے لے کر نامعلوم اسباب کی طرف سفر کرتی نظر آتی ہے۔
​ناصر کاظمی کے انتقال کو آدھی صدی ہو گئی ہے مگر اُن کی سادگی میں پرت در پرت مفاہیم اب بھی بہت کچھ سوچنے کی دعوت دیتے ہیں۔ متنوع بحور کے استعمال اور غنائی پہلو نے کبھی بھی اپنی کیفیت کو کم نہیں ہونے دیا۔ ناصر کاظمی پر بہت سا کام ہوا، مگر اس کی ضرورت محسوس کی جا رہی تھی کہ جو کام اب تک ہوا ہے اس کا انتخاب اور اس کے ساتھ ساتھ نئے مضامین لکھوائے جائیں اور ناصر کاظمی کی لمحۂ موجود میں نئی تفہیم آپ تک پہنچائی جائے۔ امید ہے کہ "ناصر کاظمی نمبر” ناصر فہمی میں ایک نئے باب کا اضافہ ثابت ہوگا۔