حکایاتِ پنجاب(جلد دوم)

ڈسکرپشن

مغلیہ حکومت کے کمزور ہونے سے متحدہ ہندوستان میں انگریزوں کے قدم جمنے لگے اور ملک کا نظم و نسق عملاً ایسٹ انڈیا کمپنی کے ہاتھوں میں آ گیا تو انگلستان سے افسر بھی یہاں آنے لگے۔ برصغیر کی زبانوں اور یہاں کے طور طریقوں سے انہیں ذرا بھی واقفیت نہیں ہوتی تھی۔ ان کی اس کمزوری کو دور کرنے کی غرض سے فورٹ ولیم کالج قائم کیا گیا۔ اسی طرح کئی دوسرے اداروں اور اشخاص نے ہندوستان کی زبان، ادب اور کلچر کو اکٹھا کرنا شروع کیا تاکہ حکمران قوم اپنی رعایا سے بھرپور آشنائی حاصل کر سکے۔ یہ کتاب بھی دراصل اسی سلسلے کی ایک کڑی ہے جس میں ایک انگریز افسر کیپٹن آر سی ٹمپل نے The Legends of the Punjab کے نام سے تین جلدوں میں پنجاب کی لوک کہانیوں اور گیتوں کو جمع کیا ہے۔ اصل کتاب میں متعدد اصلی نظموں کو شامل کر کے پنجابی شاعری کا اصل ذائقہ بھی پیش کیا گیا تھا۔ لوک کہانیوں اور گیتوں کے اس ذخیرے میں گزرے زمانے کے پنجاب کے ہیرو اور ہیروئن شامل ہیں۔ نظموں اور گیتوں کی شکل میں سنائی ہوئی لوک کہانیوں اور لوک گیتوں میں رنگین کرداروں کی زندگی ، محبت ، مہم جوئی اور بہادریوں کو بیان کیا ہے۔ The Legends of the Punjab کا ترجمہ میاں عبدالرشید نے اُردو زبان میں ’’حکایاتِ پنجاب‘‘ کے نام سے کیا ہے۔ یہ کتاب تین جلدوں میں دستیاب ہے۔