ریاض دلربا

’’ریاض دلربا‘‘ ہریانہ کے ادیب منشی گمانی لعل کا ناول ہے، جسے مصنف نے 1832ء میں تصنیف کیا تھا اور جیل پریس روہتک سے 1863ء میں پہلی بار اس کی اشاعت عمل میں آئی تھی۔ اب تک کی تاریخ میں اُردو ناول کا نقشِ اوّل مولوی نذیر احمد کے ناول ’’مراۃ العروس‘‘ کو مانا گیا ہے، یہ ناول 1869ء کی تصنیف ہے۔ بعض نقاد کے نزدیک ان دونوں ناولوں کے سنہِ تصنیف کے پیشِ نظر یہ بات واضح ہو جاتی ہے کہ روہتک کے منشی گمانی لعل کا ناول ’’ریاضِ دلربا‘‘ مولوی نذیر احمد کے ناول ’’مراۃ العروس‘‘ سے 37 برس پہلے کی تصنیف ہی نہیں بلکہ ناول کا نقشِ اوّل بھی ہے۔ یہ ناول 1990ء میں بھارت سے ہریانہ اُردو اکیڈمی کی طرف سے شائع ہو چکا ہے، جسے ابنِ کنول نے ایڈٹ کیا تھا۔ گمان لعل مسکین کے حالات تذکروں میں نہیں ملتے البتہ ابنِ کنول کے مطابق منشی گمانی لعل رہتک میں سکونت پذیر تھے لیکن ان کا آبائی وطن قصبہ رامپور تھا۔ گمانی لعل مسکین سے چار تصانیف وابستہ ہیں: ریاض دلربا، بھگت مال، بہارستانِ عقل و دانش اور بہارستانِ عقل و فرہنگ۔ کچھ نقاد اسے اُردو کا پہلا ناول نہیں گردانتے بلکہ کہتے ہیں کہ روایتی ادب میں طبع زاد قصوں کی کوئی اہمیت نہ تھی بلکہ پرانے اور معروف قصوں کو اپنے رنگ میں لکھنے پر اکتفا کیا جاتا تھا، ریاض دلربا بھی اسی سلسلے کی ایک کڑی ہے۔ بظاہر گمانی لعل مسکین کو محض قصہ نویسی سے غرض نہ تھی بلکہ وہ اپنی علمیت کی دھاک بھی بٹھانا چاہتے تھے۔ نتیجہ یہ کہ ریاض دلربا میں اوّل تا آخر ایسی نثر سے واسطہ پڑتا ہے جو نہایت معرب، مفرس اور عالمانہ ہے۔ اس گاڑھے اسلوب سے کہیں ذرہ برابر انحراف نہیں کیا گیا۔ چنانچہ بادشاہ ہو یا فقیر، کوتوال ہو یا ٹھگ، طوائف ہو یا بادشاہ زادی، سب بالکل ایک ہی لب و لہجے میں گفتگو کرتے ہیں۔ یہ لب و لہجہ سراسر ادبی ہے، اس پر روزمرہ کی بول چال کا سایہ تک نہیں پڑا ہے۔ کتاب کے آخر میں حواشی اور مشکل الفاظ کی فرہنگ بھی دی گئی ہے۔