مقالاتِ مولوی محمد شفیع (جلد دوم)

پروفیسر ڈاکٹر مولوی محمد شفیع اورینٹل کالج، پنجاب یونیورسٹی کے استاد اور پرنسپل تھے۔ ان کے بیش قیمت مضامین پر مشتمل تمام جلدیں مجلس ترقی ادب لاہور نے کئی برس پہلے شائع کی تھیں۔ ان مقالات کی دوسری جلد ایک عرصے سے نایاب تھی۔ علمی و ادبی حلقوں میں اس کی طلب کے پیشِ نظر حال ہی میں مقالاتِ مولوی محمد شفیع جلد دوم شائع کی گئی ہے۔ تاریخ و تصوف، ادبِ عالیہ اور تحقیق جیسے موضوعات پر لکھے گئے یہ مقالات ان کے صاحبزادے جناب احمد ربانی نے تالیف کیے ہیں۔ ان میں بیشتر مقالات متون کی پرکھ اور درستی کے بارے میں لکھے گئے ہیں۔ اس کتاب میں شامل مضامین اور مقالے محققین اور صحتِ متن کی جانچ پر مامور مصنّفین کے لیے رہنمائی کا اہم ذریعہ ہیں۔ ان مقالات کے مطالعے کے بعد اس بات کا اندازہ ہوتا ہے کہ مولوی صاحب کو قیمتی خطی نسخوں متعارف کرانے کا شوق تھا اور اس میدان میں انھیں خاص ملکہ بھی حاصل تھا۔ کتاب میں شامل پہلا مقالہ سیّد محمد نور بخش پر ہے جو فرقہ نور بخشی کے متعلق ہے۔ اس میں ان کے حالاتِ زندگی، ان کے خلفا، عقائد، لٹریچر وغیرہ کا ذکر ہے۔ اس کے بعد قصۂ امیر حمزہ، رام پور کے کتب خانے کے دو مخطوطے، مثنوی سحرالبیان کا دیباچہ (مرقومہ 1803ء)، شمس العلماء مولوی محمد حسین آزاد، روضۂ مبارکہ بندگی حضرت دائود کرمانیؒ، خزائنِ مخطوطات، انتخابِ دیوان سنجر کاشی، اقتباس از فرحت الناظرین، تاریخ الحکما، اقتباس از تاریخ بیہق، تبصرہ و تنقید، تذکرۃ الملتان کے دو اقتباس، پنجاب کے دو مشہور قصے؛ ہیر رانجھا اور سسی پنوں وغیرہ کے موضوعات پر مختصر و طویل مقالے شاملِ کتاب ہیں۔ مؤخر الذکر مقالے میں مولوی صاحب نے تحقیقی نقطۂ نظر سے ہر دو کہانیوں کا جن زاویوں سے جائزہ لیا ہے وہ آنے والے ان محققین کے لیے مفید ثابت ہو سکتے ہیں جو پنجابی زبان میں متعلقہ موضوعات پر تحقیق کرنا چاہتے ہوں۔