مقالاتِ مولوی محمد شفیع (جلد پنجم)

قبل ازیں مجلس ترقی ادب نے یکے بعد دیگرے مقالاتِ محمد شفیع کی جلد سوم اور چہارم شائع کی تھیں۔ زیرِ تبصرہ کتاب ان کے مقالات پر مشتمل پانچویں جلد ہے۔ جس کے مرتب احمد ربانی ہیں۔ ان مقالات کے متنوع موضوعات سے پتہ چلتا ہے کہ ڈاکٹر صاحب کی معلومات اسلامی تہذیب و ثقافت کے بارے میں کس قدر وسیع و بسیط تھیں۔ انھیں خطاطی اور نقاشی جیسے فنونِ لطیفہ سے غیرمعمولی دلچسپی تھی۔ فارسی، عربی، اُردو، پنجابی اور سندھی کے نادر مخطوطے جمع کرنے کے لیے اُنھوں نے بہت تگ و دو کی۔ زیرِ تبصرہ جلد پنجم میں: احیاء العلوم، شاہ طہماسپ صفوی، صدر الصدور مفتی صدر الدین دہلوی، مرقع داراشکوہ کے محتویات کی تفصیل، نام و نسب سعدی شیرازی؛ شیخ الاسلام بہار الدین ابو محمد زکریا ملتانی کی سوانح؛ مریدین، کرامات و انتقال، روضہ، مرثیہ، تصانیف و شجرئہ نسب، ظفرنامہ حمد اللہ مستوفی اور دیگر موضوعات پر مفصل مقالے شامل ہیں۔